Президент Садыр Жапаров бир катар мамлекеттик ооруканаларга жаңы жылдан тарта өз алдынча иш алып барууга мүмкүнчүлүк берген жарлыкка кол койду. Бул тууралуу Саламаттык сактоо министрлиги билдирет.
Жарлыкта учурдагы башкаруу модели мамлекеттик медицинанын өнүгүшүнө тоскоол болуп, ооруканалар финансы, кадр саясатында өз алдынча чечим кабыл ала албай жатканы белгиленген. Ошондой эле атаандаштык жагынан менчик клиникалардан артта калып кеткени да айтылган.
Бирок мындай кадам калкты медициналык жардам менен камсыздоо боюнча мамлекеттик кепилдиктерден ажыратпайт.
Бул сынамык тажрыйба 2026-жылдын 1-январынан 31-декабрына чейин жасалып, соңунда жыл ичиндеги иштин жыйынтыгы каралат. Азыр кайсы ооруканалар жаңы багыт боюнча иш алып бара тургандыгы аныкталып жатат.
