Түндүк-Чыгыш бажысынын кызматкерлери «Торугарт-Бишкек» жолунда «Mercedes-Benz Actros» жана «Volvo» үлгүсүндөгү чиркегичтери менен унааларды токтотуп, аткезчилик жол менен келаткан жүктү кармашты. Бул тууралуу Мамлекеттик Бажы кызматынан билдиришти.
Маалыматка ылайык, кармалган товарлардын жалпы суммасы 11 458 331 сомду түзөт.
Алуучу ЖЧКнын өкүлү «К.Ш.Т» аттуу жарандын катышуусунда автоунааларды текшерүүдө балдар арабалары, самокаттар, тамактандыруу үчүн отургучтар, бешиктер, велосипеддер – товарларынын ассортименти табылган. Жүктүн ЕАЭБдин бажы аймагына ташып келүүнүн мыйзамдуулугун тастыктаган тиешелүү жүк коштоочу документтери болгон эмес.
Бул факты маалыматтык электрондук журналга катталып, кароо жана тиешелүүлүгү боюнча чечим кабыл алуу үчүн Башкы прокуратурага өткөрүлүп берилди.
