2022-жылдын 25-февралынан 17-мартына чейин 62,5 килограмм алтын куймалары 406,1 миллион сомго сатылган. Бул тууралуу журналисттерге Улуттук банктан билдиришти.
Жалпысынан алтын куймаларын сатуу долбоору башталгандан бери 1 миллиард 451,6 миллион сомго 368,2 килограмм алтын сатылган. «Бүгүнкү күндө алтын куймаларынын бардык түрлөрүнө суроо-талап жогору. Улуттук банк бардык номиналдагы, тактап айтканда, салмагы 1, 2, 5, 10, 31,1035 грамм (унция) жана 100 граммдык өлчөнгөн алтын куймаларын сатууда. Ошол эле учурда сатууга коюлган алтын куймаларынын балансы күн сайын өзгөрүп турат. Себеби кайра сатып алынган алтын куймалары менен толукталып турат. Өлчөнгөн куймалардын запастарын толуктоо зарылчылыкка жараша ишке ашат. Бүгүнкү күндө өлчөнгөн куймалардын запастарын кезектеги толуктоо боюнча иштер аткарылып жатат», — деп айтылат маалыматта.
