Тажикстанда 3 баласын даракка асып, андан соң өзү асынып каза болгон окуя боюнча териштирүү иши жүрүп жатат. Окуя Согди облусунда катталып, жергиликтүү тургундар милиция кызматкерлерине кабарлашкан. Бул тууралуу чет элдик маалымат булактары жазып чыгышты.
Маалыматка ылайык, алардын сөөгүн Пенжикент районунун Некнот айылынын тургундары байкап калышкан. Алардын айтымында, даракка асынгандардын бири балдардын өз энеси 32 жаштагы Шахло Шарипова жана анын 6 жаштагы Мухаммаджон, 4 жаштагы Шахноза жана 8 айлык Амина деген балдары болгон.
Кийинчерээк ички иштер министрлиги окуя тууралуу билдирүү тараткан. Анда «10-апрелде Пенжикент районунун Некнот айылынын тургуну 1988-жылы туулган Шарипова Шахло аттуу жаран, үй-бүлөлүк чырдан улам үч баласын жоолук менен даракка асып, андан соң өзүн асып алган»,- деп билдирген министрлик.
Өз жанын кыйган Шахло Шарипова Дүйшөмбү шаарында төрөлгөн. Ал бир нече жыл мурун Жураев аттуу жаранга турмушка чыккан. Некноттун жашоочулары буга чейин жубайлардын үйүндө олуттуу көйгөй болбогонун айтып беришкен. Алар мал багуу жана дыйканчылык менен алектенип келишкен.
