Ош шаарында аялына зомбулук көрсөтүүгө шектелген жаран кармалды. Бул тууралуу Ош ОИИБден билдиришти.

Маалыматка караганда, 22-февраль күнү Ош шаарынын 35 жаштагы тургуну милицияга арыз менен кайрылып, аны 21-февраль күнү мас абалындагы күйөөсү сөгүп, уруп, жараат келтиргендигин көрсөтүп, ага карата мыйзам чегинде чара көрүп берүүнү суранган. Мындай зомбулук бир нече ирет буга чейин дагы болуп келгендигин айткан. Арыздануучуга дайындалган соттук-медициналык экспертиза анын 4 кабыргасы жабык сынгандыгы, сол колунун манжасы сынгандыгы тууралуу корутунду чыгарып берген.

Аталган факты боюнча кылмыш иши козголгон. Шектүү жаран суракка чакыртылган, бирок ал тергөөгө келбей из жашырып кеткен. 8-март күнү Сулайман-Тоо милиция бөлүмүнүн кызматкерлери тарабынан шектүү Ош шаарынын аймагында жашынып жүргөн жеринен кармалып, милиция бөлүмүнө жеткирилген. Шектүү көрсөтмөсүндө окуя болгон учурларда мас абалда болгонун, жасаган кылмышын толугу менен мойнуна аларын билдирген. Ал мурда эки жолу сот жоопкерчилигине тартылган.

Ош шаардык ички иштер башкармалыгынын тергөө кызматы жаранды убактылуу кармоочу жайга киргизген. Тергөө иши аягына чыгарылып, сотко жөнөтүлөт.