Жалал-Абадда уюшкан кылмыштуу топтун мүчөсү кылмыштуу шериги менен кармалды. Бул туралуу Жалал-Абад ОИИБдин басма сөз кызматы билдирди.
Маалыматка ылайык, ушул жылдын 31-март күнү саат 03:00 чамасында Өзбекстандын 49 жаштагы жаранын убактылуу Жалал-Абад шаарында жашаган үйүндө уктап жаткан жеринен белгисиз жарандар киришип, «Биз общактанбыз» деп коркутуп ноутбук жана уюлдук телефонун алып, өзүн автоунаа менен талаага алып барып уруп, «50 миң сом ачка таап бересиң» деп кайра үйүнө таштап кетишкен.
Бул факт маалыматтык электрондук журналга катталып, Кылмыш-жаза кодексинин 208-беренесинде (Опузалап талап кылуу) көрсөтүлгөн кылмыштын белгилери менен кылмыш иши козголгон.
Жүргүзүлгөн ыкчам-иликтөө иштеринин натыйжасында жогорудагы окуяга шектелип, ИИМде уюшкан кылмыштуу топтун активдүү мүчөсү катары каттоодо турган Жалал-Абад шаарынын 1996-ж.т. тургуну М.А. жана анын кылмыштуу шериги Сузак районунун 1997-ж.т. тургуну Ш.М. кармалышып тергөө кызматына өткөрүлүп берилген.
Учурда тергөө амалдары улантылууда.
