КР эмгек сиңирген артисти Курсант Абдрахманов Кыргыз Улуттук «Манас» театрынын көркөм жетекчиси болуп дайындалды. Бул тууралуу аталган кызматтан билдиришти.
Буга чейин бул кызматта театрыбыздын манасчысы, Саякбай Каралаев атындагы сыйлыктын ээси Замирбек Баялиев аркалап келген. Замирбек Баялиев өз ыктыяры менен ордун бошотуп, Кыргыз Республикасынын Маданият, маалымат, спорт жана жаштар саясаты министринин буйругу менен Абдрахманов Курсант Барктабасович дайындалды.
Жаңы дайындалган жетекчини чыгармачыл жамаатка Кыргыз Республикасынын Маданият, маалымат, cпорт жана жаштар саясаты министринин орун басары Чыңгыз Эсенгул уулу тааныштырды.
Курсант Абдрахманов 1971-жылы Ысык-Көл облусунун Түп районундагы Миң-Булак айылында туулган.
Бүбүсара Бейшеналиева атындагы Кыргыз мамлекеттик маданият жана искусство университетинин драма жана кино актёрлук адистигин аяктаган.
Буга чейин Муратбек Рыскулов атындагы Нарын облустук драма театрынын көркөм жетекчиси, Касымалы Жантөшев атындагы Ысык-көл облустук музыкалык драма театрынын директору болуп иштеген.
