Малды милдеттүү түрдө мамлекеттик каттоодон өткөрүү керек. Бул тууралуу айыл чарба министрлиги фермерлерге эскертет.
Маалыматка ылайык, ири чарбаларга өз ара эсеп жүргүзүү үчүн кошумча бирка такканга уруксат берилет.
«Бирок ЖИКС маалыматтык тутумуна мамлекет тарабынан гана берилген бирка катталат. Мал-жандыкты идентификациядан өткөрүү жеке ветеринардык адистер тарабынан бирка тагуу, чип басуу жана ЖИКС маалыматтык тутумуна киргизүү менен ишке ашырылат. Жеке ветеринардык адистер айлык албагандыгына байланыштуу көрсөткөн кызматы үчүн мал ээсинен акы алат. Акы жергиликтүү бийлик тарабынан бекитилет», — деп айтылат маалыматта.
Министрлик тарабынан кызматтар үчүн орточо баа жарыялаган:
Жылкыларга чип тагуу – 150-200 сом;
Ири мүйүздүү малга, чочколорго бирка тагуу – 50 сом;
Койлорго чип тагуу – 20 сом.
