Кызматтык абалынан кыянаттык менен пайдаланган Чолпон-Ата шаарынын экс-мэри камалды. Бул тууралуу УКМКдан билдирди.
Мамлекеттик түзүмдөрдөгү уюшкан кылмыштуу топтун лидери менен кызмат адамдарынын байланышы такталып, уюшкан кылмыштуу топтун лидери маркум К.Асанбекке Чолпон-Ата шаарындагы 10 млн. сомдон ашык жер тилкесин берүүгө тиешеси бар, Чолпон-Ата шаарынын экс-мэри И.Б.Ш. тарабынан кызматтык абалынан кыянаттык менен пайдалануу фактысы аныкталды.
Аталган жарандын үйүн тинтүү учурунда мыйзамсыз сакталган ок атуучу курал ок-дарылары да табылган. Соттун чечими менен Чолпон-Ата шаарынын экс-мэри 1 айга камакка алынды.
Белгилей кетсек, ушундай эле кылмыш ишинин алкагында Ысык-Көл облусунун Ысык-Көл району боюнча «Кадастр» мамлекеттик ишканасынын филиалынын адиси кармалып, убактылуу кармоочу жайына киргизилген.
