Акылбек Жапаров Ош облусуна болгон жумушчу сапарынын алкагында Ноокат районундагы өзгөчө кырдаалдын кесепеттерин жоюунун жүрүшү менен таанышты.
Ал Ноокаттагы селден жабыркагандарга өз алдынча акча чогултуунун кажети жоктугун айтты. Анын айтымында, мамлекет жаратылыш кырсыгынын кесепетин жоюу үчүн болгон күчүн жумшап жатат, ресурстар жана каражат жетиштүү.
“Мындай учурда мекенчилдик сезим ойгонуп, кыргыздын бириге калган жакшы касиети бар. Соцтармакта азык-түлүк, каржылык жардамдарды чогултуу демилгесин көтөрүп, ар ким өз алдынча эсеп ачкандарды көрүп жатабыз. Сиздерге кайрылганыбыздын себеби — ар кимдин өз алдынча акча чогултуусунун кажети жок. Мындай учурдан алдамчылар да пайдаланып кетүүсү толук ыктымал. Адам күчү же техника менен кол кабыш кылуу ниети бар жарандар Оштогу штабга кайрылса болот”, — деди өкмөт башчы.
МинКаб башчысы Ош облусунун жетекчилигине жана тиешелүү мекемелерге өзгөчө кырдаалдардын кесепеттерин жоюу, калктын коопсуздугун камсыз кылуу жана кесепеттерин жоюу жапа чеккендерге зарыл жардамды көрсөтүү боюнча конкреттүү тапшырмаларды берди.
