8-августта Париждеги Олимпиада оюндарында Өзбекстандын бокс боюнча курама командасынын башкы машыктыруучусу Тулкин Киличевдин жүрөгү токтоп калган. Бул тууралуу Sky Sports басылмасы жазып чыкты.
Маалыматка ылайык, мушкер Хасанбой Дусматов финалда жеңишке жеткенден кийин Киличев мушкерлер машыккан жерде эс-учун жоготкон. Улуу Британиянын курамасынын дарыгери Хардж Сингх жана физиотерапевт Робби Лилис жардамга барышкан. Алар дефибрилляторду колдонууга туура келген.
«Машыктыруучу эс-учун жоготкон абалда болчу. Хардж жасалма дем алдыруу кылып, болжол менен 20-30 секунддан кийин өзүнө келди» — деген Лилис.
Тулкин Киличев кийин ооруканага жеткирилип, учурда анын абалы туруктуу.
