Бир дагы кыргызстандык үйүм жок деп, батирлеп жүрбөшү керек. Бул тууралуу президент Садыр Жапаров бүгүн, 16-декабрда Бишкек шаарындагы Скрябин көчөсүндө жайгашкан Мамлекеттик ипотекалык компания тарабынан курулган батирлердин ачкычын тапшыруу аземинде билдирди.
«Биздин максатыбыз, ар бир кыргызстандыкты үй-жайлуу кылуу. Бир дагы кыргызстандык үй-бүлө үйүм жок деп чет өлкөлөп же батирлеп жүрбөшү керек. Биз ушул максатыбызды жакынкы убактарда толук иш ашырабыз», — деди ал.
Ошондой эле өлкө башчысы жакынкы күндөрдө дагы бир маанилүү турак жай долбоорунун алгачкы этабы ийгиликтүү аягына чыгышы күтүлүп жатканын билдирди.
«Мурдагы №47 колониянын ордуна турак жайдын курулушу башталган. Буюрса, бүрсүгүнү ал жерден дагы миңдеген шаардыктарды турак жай менен камсыздайбыз деп турабыз» , — деп белгиледи президент.
