Кыргызстандын жалпы билим берүү уюмдарында милдеттүү түрдө кыргыз тили предмети боюнча жазуу жана оозеки жүзүндөгү (класстан класска) көчүрүү экзамендери киргизилет.
Билим берүү жана илим министрлигинен билдиргендей, көчүрүү «Кыргыз Республикасынын мамлекеттик тили жөнүндө» КР Конституциялык мыйзамына жана Жогорку Кеңештин «Кыргыз Республикасындагы мамлекеттик тил жана тил саясатынын маселелери жөнүндө» токтомуна ылайык киргизилүүдө.
2024-2025-окуу жылынын жыйынтыгы боюнча менчигинин түрүнө жана окутуу тилине карабастан республиканын бардык жалпы билим берүү уюмдарынын 5-6-класстарынын окуучулары, ал эми 2025-2026-окуу жылынан тартып 7, 8 жана 10-класстарынын окуучулары кыргыз тили предмети боюнча жазуу жана оозеки жүзүндөгү көчүрүү (класстан класска) экзамендерин тапшырышат.
Экзамендерди министрликке караштуу Билим берүүнүн сапатын өнүктүрүү департаменти уюштуруп, өткөрөт.
