Өлкө башчы Садыр Жапаров мамлекет ички жана тышкы инвесторлорго ар дайым ачык экенин айтты. Мындай пикирин ал бүгүн, 18-февралда “Ала-Арча” жаратылыш паркында гондоль тибиндеги асма жолду ачуу аземинде билдирди.
Түрдүү тармактарды өнүктүрүүгө инвестиция салам деп келген ишкерлерге мамлекет тарабынан болушунча шарттар түзүлүүдө, мындан ары да инвесторлордун ишмердигине ыңгайлуу жагдайларды түзүү улантылат. Алардын ишине ыксыз текшерүүлөргө мораторий дагы киргизилди.
Президент учурдан пайдаланып күч түзүмдөрүнө кайрылды.
“Мамлекеттин өнүгүүсүнө салым кошуп жаткан ишкерлерди дайны жок эле кысымга албагыла, кокус кандайдыр бир кысым-басымдын четин угуп калсам, капа болбогула”, — деди ал.
Ал ошол эле учурда мамлекет ишеним артып, тиешелүү шарттарды түзүп берип жатканда ишкерлер дагы кыянаттык кылып, салыктарын жаап-жашырбай, ак иштейт деп ишеним артты.
Андан соң президент “Ала-Арча” мамлекеттик жаратылыш паркынын аймагында курулган мейманканалык инфратүзүмдүн объектилери менен таанышты.
