Ош шаарынын мэри Жанарбек Акаев тиешелүү мекеме жетекчилери менен биргеликте Жибек-Жолу муниципалдык аймактык башкармалыгында жүргүзүлүп жаткан курулуш иштеринин жүрүшү менен жеринен таанышты.
Кыдырууда аймактагы эски мектептердин учурдагы абалы каралып, алардын коопсуздугу жана окуу шарттары талданды. Ошондой эле тургундардын кайрылуусунун негизинде спорт зал жана маданият үйү курула турган жерлер көрүлүп, тиешелүү кызматтарга долбоорлорду ыкчамдатуу тапшырмасы берилди.
Шаар башчысы өз сөзүндө Президент Садыр Жапаров тарабынан эскилиги жеткен мектептерди толук реконструкциялоо жана заманбап шарттар менен камсыз кылуу боюнча так тапшырмалар коюлганын белгилеп, бул багыттагы иштер билим берүүнүн сапатын жогорулатууга, окуучулардын коопсуздугун камсыздоого жана инфраструктураны жаңылоого чоң салым кошорун баса белгиледи.
Мындан тышкары, аймактагы жолдордун абалы жана курулуш иштеринин жүрүшү да көзөмөлдөнүп, тургундардын муктаждыктарын эске алуу менен маселелер этап-этабы менен, системалуу түрдө чечилери айтылды.
