Министр Талантбек Солтобаевдин жетекчилиги алдында Транспорт жана коммуникациялар министрлигинин кезектеги аппараттык жыйыны өттү.
Жыйынга министрдин орун басарлары, бөлүм башчылар, министрликке караштуу түзүмдүк бөлүмдөрдүн жетекчилери жана мекеме-ишканалардын башчылары, ошондой эле онлайн форматта Жол тейлөө ишканаларынын жетекчилери катышты.
Жооптуу жетекчилерден өткөн жыйында берилген тапшырмалардын аткарылышы боюнча маалымат алган Министр “Өндүрүштүк-инновациялык борбор” мамлекеттик мекемесинен башка ишканаларда иш системалык түрдө жүрбөй жаткандыгын айтып сындады.
Жыйындын жүрүшүндө иш кагаздарынан арылып, санариптештирүүгө өтүүнү ыкчамдатуу, Түндүк-Түштүк жолунун ачылышына карата максималдуу даярдык иштерин жүргүзүү, Чүй облусунда курула турган 4 ири жолдун планын кыска мөөнөттө бекитилиши боюнча тийиштүү жетекчилерге тапшырмалар берилди.
Мындан тышкары, жаздын келиши менен сел жүрүү коркунучтарынын алдын алуу боюнча ӨКМ жана жергиликтүү бийликтер менен алдын ала иштерди алып барууну тапшырды.
Жыйында ошондой эле, “Жашыл мурас” долбоорунун алкагында сейил бактарын уюштуруу тапшырмасынын аткарылышы кечеңдеп жатканы белгиленип, аткарбаган жетекчилерге чара көрүлөөрү эскертилди.
