Балыкчы шаарында синтетикалык баңгизаттарды мыйзамсыз саткан кылмыштуу топ кармалды.
Март айында “спайс” колдонуудан улам төрт уулануу фактысы аныкталып, алардын бири өлүм менен коштолгон.
Бул фактылар боюнча Кылмыш-жаза кодексинин 282-беренесинин (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) негизинде кылмыш иши козголгон.
Ага ылайык, 21 жаштагы А.М.Т. аттуу жаран 5 грамм “спайс” менен кармалган. Анын жогорудагы фактыларга тиешеси бар экени аныкталган.
Ошондой эле Бишкектен дагы 23 жаштагы эки жаран 30 грамм синтетикалык баңгизатты сатууга аракет кылып жаткан учурда колго түшкөн.
Тергөөдө кылмыштуу топтун уюштуруучусу катары 25 жаштагы У.Р.С. аныкталган. Анын үйүн тинтүү учурунда синтетикалык баңгизаттарды даярдоочу кичи лаборатория табылып, жалпы 1 кг 505 гр синтетикалык зат, жабдуулар жана башка керектүү каражаттар алынган.
Учурда шектүүлөр камакка алынып, тергөө уланууда.
