Күз ортосу майрамы жана Кытайдын улуттук күнүнө байланыштуу, кыргыз-кытай чек арасындагы автожол өткөрүү пункттарынын иш тартиби убактылуу өзгөрөт. Бул тууралуу чек ара кызматы билдирди.

«Эркечтам-автожол» жана «Торугарт-автожол» өткөрүү пункттары аркылуу жарандарды жана транспорт каражаттарын өткөрүү төмөнкү мезгилдерде убактылуу токтотулат.

Эркечтам-автожол өткөрүү пункту:

• 25-сентябрда саат 22:00дөн, 26-сентябрь саат 08:00гө чейин;
• 1-октябрь саат 22:00дөн 4-октябрь саат 08:00гө чейин.

Торугарт-автожол өткөрүү пункту:

• 25-сентябрда саат 22:00дөн 26-сентябрь саат 08:00гө чейин;
• 1-октябрда саат 22:00дөн 4-октябрь саат 08:00гө чейин.

Көрсөтүлгөн мезгилдерде жарандарды жана транспорт каражаттарын мамлекеттик чек ара аркылуу өткөрүү жүргүзүлбөйт. Мамлекеттик чек ара кызматы жарандарга, жүк ташуучуларга жана тышкы экономикалык ишмердүүлүктүн катышуучуларына кыргыз-кытай мамлекеттик чек арасы аркылуу сапарларды жана жүк ташууну пландаштырууда жогоруда көрсөтүлгөн маалыматты эске алууну сунуштайт.