Бишкекте жол тыгындарын азайтуу үчүн жасалма интеллекте негизделген “Атлас” санариптик платформасы колдонулат. Бул багытта 9-ноябрда Кыргыз мамлекеттик техникалык университети, мэриянын “Санариптик технологиялар борбору” жана Doroga стартапы кызматташуу меморандумуна кол коюшту.
Платформа жолдордогу транспорт агымын талдап, тыгындар пайда болушу мүмкүн болгон жерлерди алдын ала аныктайт. Ошондой эле айдоочуларга жана шаар тургундарына ыңгайлуу каттамдарды сунуштайт.
Долбоордун алкагында кыргыз жана орус тилдеринде иштеген ата мекендик санариптик карта да өнүктүрүлөт. Топтолгон маалыматтар шаардык инфраструктураны пландаштырууга колдонулат.
