Шаардык муз аянтында хоккей боюнча эл аралык турнирдин ачылышы болду. Бул тууралуу мэриянын басма сөз кызматы билдирди.
Маалыматка ылайык, иш-чараны мэр Айбек Жунушалиев ачты. «Нарын Хоукс» командасынын оюнчусу Мерадил Мелсов менен «Рига» командасынын оюнчусу Эрнест Ципулис символикалык түрдө биринчи шайбаны ыргытышты.
Турнирдин ачылыш аземине хоккей федерациясынын президенти Анвар Оморканов жана Хоккей федерациясынын өкүлдөрү катышты.
Белгилей кетсек, мелдеш Казакстан, Өзбекстан, Россия Федерациясы, Латвия жана Кыргызстандын командаларынын ортосунда өтмөкчү.
Ошондой эле бул спорттук иш-чара өлкөдө хоккейди өнүктүрүү жана жайылтуу, спортчулардын достук, спорттук мамилелерин кеңейтүү жана чыңдоо, сергек жашоо образын жайылтуу жана өсүп келе жаткан муундун ден соолугун чыңдоо максатын көздөйт.
