Жалал-Абад областында «Кыргызавтожол» МИ аймактык башкармалыктарында мамлекетке ири өлчөмдө зыян келтирилгени аныкталды. Бул тууралуу УКМКнын басма сөз кызматы билдирди.
Маалыматка ылайык, Транспорт жана коммуникациялар министрлигине караштуу «Кыргызавтожол» мамлекеттик ишканасынын Жалал-Абад филиалынын аймактык органдарынын кызматкерлери көп убакыттан бери кызмат абалынан кыянаттык менен пайдаланып, өздөрүнүн жүктөлгөн кызматтык милдеттерин адилетсиз аткарып, эл аралык, мамлекеттик жана жергиликтүү маанидеги жолдорго асфальт-бетон төшөлмөсүн монтаждоо боюнча негизсиз, ашыкча баалоо боюнча кылмыштуу схеманы уюштурушкан.
«Кыргызавтожол» МИ Жалал-Абад филиалынын аймактык органдарынын кызмат адамдарына карата, КР Кылмыш-жаза кодексинин 337-беренесинин 3-бөлүмү (Кызмат абалынан кыянаттык менен пайдалануу) боюнча кылмыш ишин козголгон.
Ыкчам-иликтөөнүн натыйжасында 12 миллион сом өлчөмүндө алдын ала зыян аныкталган. Буга байланыштуу «Кыргызавтожол» мамлекеттик ишканасынын аймактык башкармалыктарынын жумуш орундарында тинтүү иштери жүргүзүлгөн.
Учурда тергөө-ыкчам иш-чаралары жүрүп жатат.
