Кыргызстандын балдар укугу боюнча ыйгарым укуктуу өкүлү Асель Чынбаева президент Садыр Жапаровдун атынан Токмок шаарындагы борбордук нерв системасы жабыркаган жана психикалык жактан жабыркаган балдарды жана үй-бүлөлөрдү реабилитациялоо боюнча республикалык адистештирилген борборунун тарбиялануучуларына жаңы жылдык белектерди тапшырды.

Камкордукка жана колдоого өзгөчө муктаж балдарга көңүл буруу максатында жаңы жылдын алдында аталган борбордун тарбиялануучуларына Мамлекет башчысынын атынан белектер тапшырылды.

Асель Чынбаева балдарды Президент Садыр Жапаровдун атынан келе жаткан жаңы жылы менен куттуктап, ден соолук жана бакыт каалады.

Адистештирилген реабилитациялык борбор – оор турмуштук кырдаалга туш болгон балдарга жана төрөлгөндөн 4 жашка чейинки балдары бар үй-бүлөлөргө, анын ичинде 7 жашка чейинки өзгөчө муктаждыктары бар балдарга медициналык-социалдык жардам көрсөтүүчү медициналык-социалдык, реабилитациялык жана билим берүүчү саламаттык сактоо уюму.

Реабилитациялык борбордун кызматынан ата-энесинин камкордугусуз калган балдар, жетим балдар пайдаланышат; ден соолугунан мүмкүнчүлүгү чектелген балдар; кароосуз калган балдар; аз камсыз болгон үй-бүлөлөрдө жашаган балдар; ошондой эле зомбулуктун же кылмыштын курмандыгы болгон балдар.

Учурда борбордо 51 бала бар, анын ичинен: күндүзгү бөлүмдө – 20, күнү-түнү иштөө бөлүмүндө – 31. Анын ичинен: бир жашка чейинки балдар – 5, бир жаштан үч жашка чейин – 19, үч жаштан жогору — 27 бала. Жалпы балдардын 37си ден соолугунун мүмкүнчүлүгү чектелген балдар.