Билим берүү жана илим министрлиги мугалимдерге кайрадан квалификациялык категорияларды ыйгарат. Бул үчүн 2021-жылдын май айынан баштап, кийинки окуу жылынын башталышына чейин мектеп мугалимдеринин ыктыярдуу аттестациясын өткөрүү пландалууда.

Мугалимдерге квалификациялык категорияларды ыйгаруу аттестациялоонун негизинде ишке ашырылат. Кийинки окуу жылынын башынан баштап бул үчүн ай сайын кошумча акы төлөө калыбына келтирилет.

Жалпы билим берүүчү уюмдардын категория ээси болгон мугалимдерине кошумча төлөмдөр жумасына 20 саат иштегени (окутуучулук иши) үчүн төлөнөт:

Жогорку категория үчүн – 2000 сом;
Биринчи категория үчүн – 1500 сом;
Экинчи категория үчүн – 1000 сом.

2021-жылдын 4 айына жалпы билим берүүчү уюмдардын мугалимдерине категория үчүн кошумча акыга республикалык бюджеттен 99,7 миллион сом каралды.

Мугалимдерди аттестациялоонун максаты:
педагогикалык чеберчилигинин деңгээлин жогорулатуу;
кесиптик жана инсандык өсүшүн камсыз кылуу;
Мугалимдерди билим берүүнүн сапатын жогорулатууга шыктандыруу.