Райондук соттун кароосундагы адамды уурдоо, эркиндигинен мыйзамсыз ажыратуу, каракчылык жана адам өлтүрүүгө аракеттенүү фактылары боюнча өзгөчө оор кылмыштар менен айыпталган айыпталуучу “С.К.Т.” Ысык-Ата убактылуу кармоочу жайдан качып кеткен. Ага көмөктөшкөн деп Ысык-Ата районунун ИИБнин нөөмөтчү-милиционерлери Ж.Т.К. жана Д.Б.К. айыпталууда. Бул тууралуу Башкы прокуратуранын басма сөз кызматы билдирди.
Ысык-Ата районунун прокуратурасы УКЖнан айыпталуучунун качуу фактысы боюнча Кыргыз Республикасынын Кылмыш-жаза кодексинин 348-беренеси (шалаакылык) менен кылмыш ишин козгоду.
Учурда иш боюнча тергөө амалдары улантылып, анын жүрүшүндө бул кылмышка тиешеси бар башка адамдарды аныктоого багытталган зарыл тергөө иштери жүргүзүлүүдө.
