Кечээ, 14-январь күнү Токмок шаарында «Мерседес» үлгүсүндөгү 2 унаа кагышып, 2 адамдын өмүрү кыйылды. Бул тууралуу ӨКМден кабарлашты.
Маалыматка караганда, кырсык саат 13:30 чамасында Бишкек–Нарын–Торугарт унаа жолунун 73-чакырымында болгон. Аталган тилкеде «Мерседес-Бенц Е220» үлгүсүндөгү унаа менен «Мерседес-Бенц S600» үлгүсүндөгү унаасы кагышкан. Кырсыктын кесепетинен 1 эркек киши (1981-жылы туулган) жана 1 аял киши (1986-жылы туулган) каза болуп, 1 эркек киши (1983-жылы туулган) жабыркады. ӨКМдин куткаруучулары каза болгон адамдарды унаадан чыгарып, ИИМ кызматкерлерине өткөрүп беришти.
Буга чейин Чүй облустук ЖКККБ кырсык болгонун тастыктап, кырсык боюнча тиешелүү иштер жүрүп жатканын билдирген болчу.
