Аламүдүн районунда уурулукка шектүү жаран кармалганын Чүй облустук милициясынын басма сөз кызматы билдирди.
Билдирүүгө ылайык, ушул жылдын 2-февралында Аламүдүн РИИБине 1985-жылы туулган Б.А. арыз менен кайрылган. Анда ошол эле күнү саат 13:00дөн 19:00гө чейинки убакыт аралыгында бирөөлөр үйүнүн терезесин сындырып кирип, 3800 долларын жана зер буюмдарын уурдап кетишкенин билдирген.
Бул факты Кылмыштардын бирдиктүү реестрине Кылмыш-жаза кодексинин 205-беренеси (Уурдоо) боюнча катталган.
Жүргүзүлгөн ыкчам издөө иштеринин негизинде жогорудагы кылмышка шектелип, 1992-жылы туулган А.С. аттуу жаран кармалган.
Шектүү тергөө абагына камакка алынып, учурда сотко чейинки өндүрүш иштери улантылууда.
