Кыргыз Республикасынын эмгек сиңирген артисти Анара Сыдыгалиева Түрк дүйнөсүнүн 2022-жылдагы эң мыкты театр актрисасы аталды. Бул тууралуу ТҮРКСОЙдун башкы катчысы Султан Раев өзүнүн социалдык тармактагы баракчасынан билдирди.
“Кыргыз улуттук театр өнөрүнүн мыкты актрисасы Анара Сыдыгалиеванын эл аралык сыйлыгы кут болсун”, — деди Раев.
Анара Сыдыгалиева Токтоболот Абдумомунов атындагы улуттук академиялык драма театрынын актрисасы, КРнын эмгек сиңирген артисти, Токтогул атындагы мамлекеттик сыйлыктын лауреаты. Ошондой эле, белгилүү театр жана кино актеру Азиз Мурадиллаевдин апасы.
ТҮРКСОЙ эл аралык уюму жана Түркиянын эң кадыр-барктуу “Театр” уюму Эл аралык театр күнүнө карата 2022-жылдын Түрк дүйнөсүнүн эң мыкты театр сыйлыгына татыктуулардын ысымын жарыялаган.
Сыйлык тапшыруу 24-апрелде Түркиянын Стамбул шаарында өткөрүлөт.
