Түп районунун Кичи-Өрүктү айылынын 32 жаштагы тургуну жайма улактан жаракат алып, ооруканада көз жумду. Бул тууралуу жергиликтүү маалымат каражаттары жазып чыгышты.
Маалыматка караганда, улак тартыш 18-март күнү уюшулган. 1990-жылы туулган тургун аттан жыгылып, анын туягы башын жарып кеткен. Аны дароо ооруканага жеткиришкен. Дарыгерлер башы жарылганын айтышып, дароо операция жасоо керектигин айтып, облустук ооруканага жиберишкен. Каракол шаарындагы ооруканада операция жасалып, 19-мартка караган түнү көз жумган. Маркумдун артында келинчеги жана бир кызы калды.
