Ат-Башыда районунда топоздун этинен кайра иштетилген азык-түлүк экспортко чыгууда. Бул тууралуу Айыл чарба министрлигинин басма сөз кызматынан билдиришти.
Маалыматка караганда, Ат-Башыдагы 30+20+10 долбоорунун алкагында мал чарбачылыгынан топоз чарбасы тандалып алынган.
«Фермерлер менен сүйлөшүүлөр уюштурулуп, топоздорду өндүрүү жана көбөйтүү аракеттери көрүлүүдө. Ошондой эле топоз этинен тушёнкаларды өндүрүү менен экспортко, ички рынокко сатуу боюнча иштер жүргүзүлүүдө. Бардык өндүрүлгөн продукциялар Ат-Башы эт комбинатына өткөрүлүп, ал жерден кайра иштетилет», — делет малыматта.
Белгилей кетсек, аталган демилге райондун мал чарба секторунун өнүгүшүнө жана экспорттук мүмкүнчүлүктөрдү кеңейтүүгө багытталган.
