Коргоо министрлигинин аскер кызматкерлери баңгизатын сатуу жана колдонуу фактысы боюнча кармалды. Бул тууралуу УКМКнын басма сөз кызматы билдирди.
Билдирүүгө ылайык, жүргүзүлгөн иликтөө иштеринин жыйынтыгында баңгизаттарды таратуу жана сатуу фактысы боюнча Коргоо министрлигинин аскер кызматкерлери, прапорщик К.А.Ж. жана ефрейтер Б.Н.К. кармалды.
Коргоо министрлигинин жогорудагы аскер кызматкерлери бир нече убакыттан бери жарандарга Бишкек шаарынын аймагында “Гашиш” баңгизатын сатуу боюнча системалуу канал уюштуруп алышкандыгы аныкталган.
Аталган факты Кылмыш-жаза кодексинин 282-беренесинин 1-бөлүгү (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) менен козголгон кылмыш ишинин алкагында, Коргоо министрлигинин аскер кызматкерлери Кылмыш-жаза процессуалдык кодексинин 96-беренесине ылайык кармалып, Бишкек гарнизонунун аскердик камак жайына киргизилген.
Учурда тергөө иштери жүрүп жатат.
Посмотреть эту публикацию в Instagram
