Балыкчы шаарынын күн батышында 10,7 километр канализация тутуму курулат. Бул тууралуу президенттин Ысык-Көл облусундагы өкүлчүлүгүнөн билдиришти.
Маалыматка караганда, түтүктөр Тыныстанов, Тоголок Молдо, Мамбеталиев, Токтосунов, Каралаев, Калдыбаев көчөлөрү аркылуу өтүп, саркынды суулар Озерный көчөсүндөгү насостук станцияга куюлат.
“Курулуш иштери аяктаса, Балыкчы шаарынын калкынын 35-40 пайызы канализацияга кошула алышат. Буга чейинки канализация тутуму шаардын 40 пайызын гана камтычу. Долбоор аяктаса шаардын 80 пайызы канализацияга туташат. Ошондой эле Каракол жана Чолпон-Ата шаарларында канализация тутумдары курулат”,- деп айтылат маалыматта.
Маалыматта айтылгандай, долбоордун жалпы суммасы 957 миң долларды түзөт.
