Бүгүн Жогорку Кеңештин жыйынында Кундузбек Сулайманов депутат Адахан Мадумаровдун «Бийлигиңе түкүрдүм» деп айткан сөзүн сынга алды.
«Урматтуу кесиптештер, эртең менен коллегабыз чыгып бул бийликке түкүрдүм деди. Бул бийликтин ичинде биз дагы барбыз, демек бизге дагы түкүрдүбү. Же өзүнө-өзү түкүрүп калдыбы?! Төрага сиз жетекчи катары тартипке салып койсоңуз. Этияттап сүйлөш керек, эл карап турат бизди»,- деди Сулайманов.
Ал эми, төрага Нурланбек Шакиев ал сөз болгондо жыйында жок экенин айтып, бирок татыктуу жооп алаарын билдирди.
«Тилекке каршы, ал сөз болгондо бул жерде жок элем. Бул жерде болгондо сөзсүз жообумду бермекмин, азыр ал киши жыйында жок. Бирок, татыктуу жообун беребиз»,- деди Шакиев.
Парламенттин бүгүнкү жыйынында депутат Адахан Мадумаров «Бийлик камактагы беш аялдан коркуп жаткан болсо, бул бийлигиңе түкүрдүм»,- деген.
