Бишкекте тоноочулукка шектелип 16 жаштагы өспүрүм кармалды. Бул тууралуу борбор калаанын Ленин райондук ички иштер башкармалыгынан билдиришти.
Маалыматка караганда, милицияга шаар тургуну кайрылып, 8-март күнү базарлардын биринде бир жигит уулун бычак менен коркутуп, 14 миң 100 сомдук уюлдук телефонун уурдап кетип, изин жашырып кеткенин билдирген.
Аталган факты боюнча Кылмыш-жаза кодексинин 207-беренеси «каракчылык» менен иш козголду. Укук коргоо кызматкерлери 16 жаштагы шектүүнү таап, кармашкан. Ленин райондук соту анын баш коргоо чарасын үй камагында калтырган. Учурда шектүүнүн башка ушул сыяктуу кылмыштарга катыштыгы бар-жогун тактоодо.
