Криминалдык милиция кызматкерлери Бишкекте эки жыл мурун унаа уурдагандыгы үчүн издөөдө жүргөн 26 жаштагы кылмышкерди кармады. Бул тууралуу Ички иштер министрлигинин басма сөз кызматы билдирди.
«2019-жылдын июнь айында Жалал-Абад облусунун Кара-Көл шаарында белгисиз адамдар жергиликтүү тургундун үйүнүн жанында токтоп турган ак түстөгү «Субару Легаси» унаасын уурдап кетишкен. Кийин белгилүү болгондой, чет элдик унаа жакында эле Грузиядан алынып келинип, унаага транзиттик номурлар орнотулган. Ээсине келтирилген чыгым 586 миң сомду түзгөн. Ошол эле жылдын декабрь айында ыкчам кызматкерлери шектүүнүн өздүгүн тактоого жетишкен жана ал издөөдө жүргөн адамдардын тизмесине киргизилген», — деп берилет маалыматта.
Ыкчам тергөө иш-чаралардын жүрүшүндө, кылмышкер Бишкек шаарынын Көк-Жар турак-жай аймагындагы Шоокум көчөсүндө кармалган. Белгиленгендей, кылмышка шектүү ИИМдин атайын эсебинде уюшкан кылмыштуу топтун мүчөсү катары катталган. Уурдалган унаа азырынча табыла элек. Учурда тергөө иштери жүрүп жатат.
