Бүгүн, 29-декабрда Токтогул Сатылганов атындагы Кыргыз улуттук филармониясында “Тазалык” ишканасынын кызматкерлери үчүн салтанаттуу майрамдык иш-чара болуп өттү. Бул тууралуу мэриядан билдиришти.

Маалыматка ылайык, иш-чарада Бишкек шаарынын мэри Айбек Жунушалиев ишкананын кызматкерлерине ак ниет жана үзүрлүү эмгеги, ошондой эле борбор калаанын өнүгүшүнө жана көрктөндүрүлүшүнө кошкон зор салымы үчүн ыраазычылык билдирди.

Шаар башчысы кызматкерлерди келе жаткан Жаңы жыл менен куттуктап, “Тазалык” ишканасынын директоруна жаңы адистештирилген техникалардын ачкычтарын тапшырды.

Мэр шаардык кызматтардын, анын ичинде “Тазалыктын” кызматкерлеринин эмгек шарттарын жакшыртууга өзгөчө көңүл буруп жатканын белгиледи.

“Акыркы эки жылда ишканага заманбап талаптарга жооп берген 188 даана атайын техника берилди. Анын ичинен 20 даанасы бүгүн тапшырылып жатат. Бул техника иш процесстерин тездетүүгө, көрсөтүлүп жаткан кызматтардын сапатын дагы да жогорулатууга мүмкүндүк берет деп ишенем”, — деп айтты ал.

Майрамдык иш-чарага “Тазалык” ишканасынын 1200гө жакын кызматкери, ошондой эле шаардык жана тармактык кызматтардын өкүлдөрү катышты.

Коноктор үчүн концерттик программа уюштурулуп, Кыргыз улуттук филармониясынын артисттери музыкалык жана вокалдык чыгармаларды аткарып, майрамдык жана салтанаттуу маанай тартуулашты.

Ошондой эле иш-чаранын алкагында өзгөчөлөнгөн кызматкерлер сыйланып, жогорку кесипкөйлүгү жана шаардык коммуналдык тармакты өнүктүрүүгө кошкон салымы үчүн ыраазычылык каттар жана ардак грамоталар менен сыйланышты.