Бишкектеги унааларды өрттөп жүргөн деген шек менен 1989-жылы туулган К.Д. аттуу адам кармалды. Бул тууралуу Октябрь райондук ички иштер бөлүмүнүн басма сөз кызматынан билдирди.
Маалыматка караганда, 31-январда болжол менен түнкү саат 01:45тер чамасында милицияга Ахунбаев-Абай көчөлөрүнүн кесилишинде жеңил унаа өрттөнүп жатканы жөнүндө маалымат түшкөн.
Аталган жерге Октябрь РИИБнин тергөө тобу барганда, борбор калаанын тургуну Ахунбаев көчөсүндө токтоп турган «Мерседес Спринтер» үлгүсүндөгү унаасын белгисиз адамдар өрттөп салышканын айткан.
Белгилей кетсек, ошол эле түнү Бишкектин ар кайсы көчөлөрүндө дагы 6 унаа өрттөлгөн.
Бул фактылар Кылмыш-жаза кодексинин 216-беренеси (башка бирөөнүн мүлкүн жок кылуу же зыянга учуратуу) менен Кылмыштардын жана жоруктардын бирдиктүү реестрине катталган.
Милиция кармалган адамдын башка кылмыштарга да катышы бар деп белгилейт. Бул бул багытта ушул тапта тергөө жүрүүдө.
