Бишкектеги Горький атындагы сейил бакта журналист Арзыгүл Галымбетовага багышталып куран окулду.
Эскерүүгө журналисттер, маркумдун кесиптештери, активисттер жана “Чек ара” коомдук бирикмесинин өкүлдөрү келди.
AKИpress маалымат агенттигинин аймактык кабарчысы Арзыгүл Галымбетова 26-мартта көз жумду.
Ал кыргыз-тажик чек арасындагы чыр-чатактарды чагылдырып келген. 38 жаштагы журналисттин жүрөгү токтоп калганы айтылды.
Арзыгүл Галымбетова 1984-жылы 24-ноябрда Баткен шаарында туулган.
2009-жылы К.Карасаев атындагы Бишкек гуманитардык университетинде журналистика жана информатика факультетин окуп бүтүргөн. Эмгек жолун 2007-жылы «Эхо Манас» телерадиокомпаниясында алып баруучу болуу менен баштаган.
2007-2008-жылдары «Кыргызстан обондору» радиостанциясында кабарчы жана радио алып баруучу болгон.
2008-2009-жылдары «КТР ОБО» гезитинде кабарчы болуп эмгектенген.
2010-жылдан бери АКИpress маалымат агенттигинде кабарчы, Баткен облусундагы өкүлү болчу.
