Бишкек шаарындагы ЖЭБ-2 кийинки кыш мезгилинде ишке кириши мүмкүн. Бул тууралуу «Газпром Кыргызстан» ЖЧКсынын башкы директорунун экономика жана каржы боюнча орун басары Арзымат Алдаяров Sputnik агенттигинин маалымат борборунда өткөн брифингде билдирди.
Анын айтымында, газ жеткирүү боюнча келишимге кол коюлган.
«Бизге белгилүү болгондой, ЖЭБди реконструкциялоо долбоору мамлекеттик органдарда каралууда. Биз 2027/2028-жылдардын жылытуу мезгилинде ЖЭБ-2ге газ берүү башталат деген негизде бардык инвестициялык программаларды пландаштыруудабыз. Коңшу мамлекеттер менен келишимдер түзүлүп, анын алкагында магистралдык транспорттук объектилердин курулушу башталды», — деди ал.
Өткөн жылы «Газпром Кыргызстан» ЖЭБ-2 жана «Бишкексельмаш» отканасы оңдолуп бүткөндөн кийин газга кошуларын маалымдаган.
