БШК Свердлов району боюнча Жогорку Кеңештин депутаттыгына талапкер Абдурахманхаджи Муртазалиевди каттоону жокко чыгарды. Мындай чечим 9-мартта БШКнын жыйынында кабыл алынды.
Шайлоо комиссиясынын төрайымы Нуржан Шайлдабекованын айтымында, буга чейин ыкчам аракеттенүү боюнча координациялык топ каттоону жокко чыгарууну сунуштаган. Ал белгилегендей, Абдурахманхаджи Муртазалиев БШКнын чечимине каршы сотко кайрыла алат.
27-февралда Бишкекте бир мандаттуу эки округда шайлоо өттү. Бир мандаттуу Биринчи Май округу боюнча Элвира Сурабалдиева көпчүлүк добушка ээ болду — 47,97 пайыз. Свердлов районундагы шайлоодо Абдурахманхаджи Муртазалиев жеңип чыкты. Ага шайлоочулардын 19,52 пайызы добуш берген.
