Беловодск айылында базарда курал сатып жаткан жаран кармалды. Бул тууралуу Чүй облустук милициясынын басма сөз кызматынан билдиришти.
Маалыматка караганда, Москва РИИБге жаран курал сатып жүргөндүгү тууралуу маалымат түшкөн. Бул факт Кылмыш-жаза кодексинин 267-беренесинде (куралды, ок-дарыларды мыйзамсыз жүгүртүү) каралган кылмыштын негизинде Москва РИИБге катталып, сотко чейинки териштирүүлөр башталган.
Жүргүзүлгөн зарыл болгон тергөө-ыкчам иш-чараларынын жүрүшүндө курал-жарак сатуу фактысы тастыкталып, Чүй ОИИБдин кылмыш иликтөө кызматкерлери жана Москва РИИБдин кызматкерлери тарабынан 55 жаштагы жаран кармалган. Шектүү Москва районунун Беловодск айылынын базарында бир атар, 16-калибрдеги ТОЗ үлгүсүндөгү мылтыкты жана 2 ок-дарысын сатканы белгилүү болгон.
Ошондой эле жогорудагы куралды Чүй облусунун Панфилов районундагы кашарлардын биринен уурдап кеткени белгилүү болду. Кармалган адам убактылуу кармоочу жайга киргизилди. Учурда тергөө иштери уланууда.
