19-20-августта Чолпон-Ата шаарында Евразия экономикалык биримдигине (ЕАЭБ) мүчө-мамлекеттердин өкмөт башчыларынын кезектеги жыйыны өтөт. Жыйындын катышуучуларынын жана анын меймандарынын коопсуздугун камсыз кылууга, Ысык-Көл облусунун ички иштер органдарынын бардык күч жана каражаттары тартылды. Ошондой эле, кошумча күчтөр республикабыздын башка региондорунан да тартылат. Бул тууралуу Ысык-Көл ОИИБдин Басма сөз кызматы билдирди.
Чолпон-Ата шаарында өтө турчу саммиттин жүрүшүндө коомдук коопсуздукту 1000 ашык укук коргоо органдарынын кызматкерлери сакташат.
Көрүлүп жаткан аракеттер – расмий делегациялардын мүчөлөрүнүн коопсуздугун камсыз кылуу менен бирге, шаардын ичинде, анын көчөлөрүндө укук тартибин сактоого багытталган. Ошол эле учурда, жарандарыбыздын күнүмдүк турмушунун ритми сакталып, алардын укуктарына чектөөлөргө жол берилбейт.
