Дүйнөлүк банктын Аткаруучу директорлор кеңеши Өзбекстанда калктын жашоо шартын жакшыртууга багытталган 250 миллион долларлык каржылоо пакетин жактырды. Бул тууралуу банктын Ташкенттеги өкүлчүлүгүнүн басма сөз кызматы маалымдады.
Маалыматка ылайык, «Шаарларда жашоо үчүн жагымдуу шарттарды түзүү жана өндүрүмдүүлүктү жогорулатуу» программасы өлкөнүн 13 аймагындагы 16 район жана шаарда ишке ашырылат. Программанын алкагында калк жана бизнес үчүн муниципалдык кызматтарга жеткиликтүүлүктү кеңейтүү көздөлөт.
Долбоор социалдык жана коммуналдык инфраструктураны, транспорттук тармакты, коомдук мейкиндиктерди, соода, ишкердик жана туристтик объекттерди өнүктүрүүгө багытталган. Ошондой эле жергиликтүү өз алдынча башкаруу органдарынын аймактарды пландоо жана өнүктүрүү мүмкүнчүлүктөрүн бекемдөө каралган.
Программа жарандар менен бизнестин түз катышуусу аркылуу ишке ашырылып, калктын, анын ичинде аялдардын муктаждыктарын эске алат. Натыйжада 2030-жылга чейин түздөн-түз 1 миллионго жакын адамдын жашоо шартын жакшыртуу пландалууда.
