Дастан Бекешев кийим-кече, сумка жана башка товарларды өндүрүүдө техникалык кара куурайды (каннабис) колдонууну сунуштады. Бул тууралуу ал Жогорку Кеңештин жыйынында билдирди.
Анын айтымында, кыргызстандык тигүү ишканалары Россияда жакшы таанылган.
«Өндүрүштө Түркия же Кытайдан келген эмес, өзүбүздүн жергиликтүү кездемелер колдонулса жакшы болмок. Башка өлкөлөрдө, мисалы, Америкада кара куурайдан жасалган кийимдерди, сумкаларды сатып алса болот2, — деди депутат.
Өз кезегинде суу ресурстары, айыл чарба жана кайра иштетүү өнөр жайы министринин орун басары бул багытта Ички иштер министрлиги менен биргелешип иш алып баруу жана мыйзамдарга өзгөртүүлөрдү киргизүү керектигин билдирди.
«Ошондой эле техникалык кара куурайды сыноодон өткөрүү боюнча иштерди жүргүзүп, андан соң корутундуну Улуттук илимдер академиясына өткөрүп беребиз. Техникалык кара куурайдан жасалган кездемелерди армияда да колдонсо болот», — деп баса белгиледи министрдин орун басары.
