Картошка рыногундагы абалга мониторинг жүргүзүлдү. Бул тууралуу Cуу ресурстары, айыл чарба министрлиги билдирет.
Маалыматка ылайык, ички рынокто адилетсиз соода жүргүзгөн алып сатарларга каршы рейддерди уюштуруу жана мыйзамсыз аракеттерге бөгөт коюу иш-чарасынын алкагында, Кытайдан алып келинген картошкалар өлкө рыногунда бар экендиги аныкталды. Алар кыргыз картошкасы катары сатылып жатпагандыгы белгилүү болду.
Мындан тышкары, Ветеринардык жана фитосанитардык көзөмөл кызматы картошка өстүргөн дыйкандарга продукцияны өз убагында сатуу сунушталды. Айрым дыйкандар картошканын баасы жогорулайт деген үмүт менен кампаларда сакташат. Сатуучулардын айтымында, учурда рынокто Кытайдан келген картошканын баасы 38-40 сом, ал эми жергиликтүү картошка 42–44 сомду түзөт. Ал эми жергиликтүү картошканын дүң баасы 35-40 сомдон болууда.
«Жакынкы күндөрү Араван районунда өстүрүлгөн эрте жазгы картошка рынокко чыга баштайт. Бул жагдай баанын өсүшүнө жол бербейт. Ошондуктан, продукцияны узак убакыт сактоо чирип кетүү коркунучун жаратат жана дыйкандар күткөндөй киреше алып келбей, тескерисинче чыгымга учуратышы мүмкүн», — делет маалыматта.
