Эмгек министрлиги балдарга карата зомбулуктун алдын алуу боюнча жыйын өткөрдү. Бул тууралуу аталган министрликтин басма сөз кызматынан билдиришти.

«Зомбулуктун алдын алуу — ар бирибиздин милдетибиз. Ар бир бала сүйүүгө, камкордукка жана коргоого татыктуу. Балдарга карата зомбулукту токтотуу үчүн баарыбыз колубуздан келген бардык аракетти көрүшүбүз керек», — деп Эмгек министринин орун басары Айнура Орозбаева онлайн форматта сөз сүйлөп жатып билдирди.

Жыйындын жүрүшүндө балдарга карата зомбулук жана ырайымсыз мамиле кылууга каршы аракеттер талкууланып, зомбулуктун түрлөрү — психологиялык, физикалык, экономикалык жана сексуалдык зомбулук боюнча маселелер каралды. Өзгөчө көңүл өспүрүмдөр арасындагы зомбулуктун алдын алууга, балдар үчүн коопсуз жана колдоочу чөйрө түзүүгө, үй-бүлөдө зомбулуксуз тарбия берүү жана ата-энелердин жоопкерчилигин жогорулатууга, ошондой эле баланын пикирин эске алууга бурулду.
Мындан тышкары, аймактык эмгек, социалдык камсыздоо жана миграция башкармалыктарынын балдарга карата зомбулук фактылары боюнча көрүп жаткан иш-чаралары талкууланды. Региондордон келген жетекчилер бул багыттагы иштер системалуу жүргүзүлүп жатканын, пландуу иш-чаралар ишке ашырылып, алдын алуу жана түшүндүрүү иштери жеринде өткөрүлүп жатканын белгилешти.

Ошондой эле жыйында үй-бүлөдөгү зомбулуктун деңгээлине таасир этүүчү социалдык-экономикалык факторлор жана аларды чечүүнүн мүмкүн болгон жолдору каралды.

Жыйындын соңунда ата-энелер балдардын жоопкерчилигин жана билимин жогорулатуу, балдардын социалдык адаптациясын камсыз кылуу жана алардын тарбияланышы үчүн коопсуз, жагымдуу чөйрө түзүү боюнча тиешелүү тапшырмалар берилди.