«Манас» аэропортунан Стамбулга эжесинин паспорту менен учмакчы болгон 37 жаштагы кыргызстандык аял кармалды. Бул тууралуу УКМКнын Чек ара кызматынан билдиришти.
Маалыматка караганда, текшерүү учурунда чек ара кызматы паспорттогу сүрөт менен документти алып жүргөн адамдын сырткы көрүнүшүндөгү айырмачылыктарды байкаган. Жаран башка бирөөнүн паспортун көрсөткөн. Ал документ анын эжесине таандык экенин айткан.
Тиешелүү материалдар иштелип чыккандан кийин кармалган адам кошумча иликтөө иштерин жүргүзүү үчүн компетенттүү органдардын кызматкерлерине өткөрүлүп берилген.
