Коомчулукта саясатчы Фарид Ниязов борбор калаанын №21 тергөө абагынан жакын арада чыгып кетиши мүмкүн деген кептер кызуу жүрүүдө. Бул боюнча Жазаларды аткаруу кызматы комментарий берди.
«Айрымдар анын ден соолугунуна байланыштуу тиешелүү органдар тергөө абагында отургандан башка баш коргоо чарасын өзгөртүп, үй камагына чыгууга мүмкүндүк берет деп эсептешет. Фарид Ниязов бир катар кылмыш иштери боюнча айыпталуучу болуп саналат жана анын мазмунун жана мөөнөтүн сот гана аныктайт. 9-мартта 63 жаштагы Ниязов Улуттук кардиология жана терапия борборунда комплекстүү медициналык текшерүүдөн өттү. Тактап айтканда, эхокардиография, ЭКГ, ички органдардын УЗИ, калкан бези, кан тамырлар, клиникалык жана биохимиялык анализдер жүргүзүлгөн. Ошондой эле консилиюм болуп тиешелүү адистердин катышуусу менен диагнозу аныкталган.
Анын жыйынтыгы боюнча бейтапка дары-дармек жазып беришкен. Бүгүнкү күнү Ниязов №21 мекемеде тергөө абагында камакта, медициналык кызматкерлердин көзөмөлүндө»,- деп айтылат маалыматта.
