Бүгүн, 18-февралда Грузиянын премьер-министри Георгий Гахария атайын брифингде кызматтан кетүү чечимин жарыялады. Бул тууралуу дүйнөлүк басылмалар жазып чыкты.
Маалыматка ылайык, премьер-министр кызматтан кетүүгө бийликтеги партия менен Бириккен улуттук кыймыл оппозициялык партиясынын башчысы Никанор Мелиянын соту боюнча пикир келишпестик себеп болгонун белгиледи.
Бир күн мурун Тбилиси шаардык соту 2019-жылдагы башаламандыктар боюнча Мелияны сыртынан камакка алган. Оппозициялык партиянын кеңсесинин жанына бардык оппозициялык күчтөрдүн колдоочулары чогулушту. Алар Мелиянын камалышына жол бербейбиз деп убада кылып, ошол жерде түнү бою нөөмөттө турушкан. 18-февралда эртең менен партиянын кеңсесине Ички иштер министрлигинин өкүлдөрү келишти. Бирок Мелия өзүнө коюлган күнөөлөрдү четке кагууда.
