Ички иштер министрлигине эртеден бери добуш сатып алуу боюнча 8 кайрылуу түштү. Бул тууралуу бүгүн, 11-апрелде ИИМдин өкүлү Султан Макилов брифингде билдирди.
«ИИМге 26 кайрылуу түшкөн. Үгүт иштери боюнча 12, добуш сатып алуу боюнча 8, шайлоочуларды ташуу боюнча 3 жана башка маселе боюнча кайрылуу келди.
Ошто, Баткенде, жасалма документтерди жасоого байланыштуу Токтогулдагы шек боюнча маалымат берүү аракети болгон. Ошондой эле социалдык тармакка Бишкек шаарындагы №1312 шайлоо участкасында добуш сатып алуу жүрүп жаткандыгы тууралуу видео жарыялангандыгын баарыңыздар көрдүңүздөр. Окуя болгон жерге документтер тобу келип, сотко чейинки процесстер башталды», — деди ал.
