Интернет аркылуу баңгизат саткан 30 онлайн-дүкөн аныкталып, ишмердүүлүгүнө бөгөт коюлганын ИИМдин басма сөз кызматы билдирди.

Маалыматка ылайык, кызматкерлер Darknet, ViPole, Telegram жана башка интернет аянттарында тыюу салынган заттарды сатуучу жактарды аныктоо үчүн мониторинг жүргүзгөн.

Кезектеги мониторинг жүргүзүү учурунда 2021-жылдын декабрында Бишкек шаарында интернет дүкөн аныкталып, ал жактан башкармалыктын кызматкерлери тарабынан, 10 млн. сумманы түзүүчү, синтетикалык баңгизаттарды даярдоочу, өндүрүүчү баңгилик лабораторияга бөгөт коюлган.

Азыркы күндө баңгизат каражаттарды жана психотроптук заттарды таркатуучу интернет-дүкөндөрдү уюштуруучулар жана ага тиешеси бар жактар аныкталып, “Кылмыштуу кирешелерди легалдаштыруу (изин жашыруу) жана “Кыргызстандын чек арасы аркылуу өтүүнүн атайын эрежелерине кирүүчү предметтердин контрабандасы” беренеси боюнча фактылар катталган.

Учурда интернет мейкиндигиндеги кылмыштарды токтотуу, синтетикалык баңгизаттарды өңдүрүүчү баңгилик лабораторияларды уюштурган жактарды аныктоо иш-чаралары улантылууда.